મુખ્યમંત્રીશ્રીએ 21મી સદીના ભારતના વિકાસમાં જ્ઞાન, વિજ્ઞાન, સંશોધન અને ટેકનોલોજીની ભૂમિકાને મહત્ત્વપૂર્ણ ગણાવતાં જણાવ્યું હતું કે, માનનીય વડાપ્રધાન શ્રી નરેન્દ્રભાઈ મોદીએ ‘જય જવાન, જય કિસાન, જય વિજ્ઞાન’ સાથે આપેલ ‘જય અનુસંધાન’નો મંત્ર દેશની સુરક્ષા, ખાદ્ય સુરક્ષા, વૈજ્ઞાનિક પ્રગતિ અને સંશોધનને એકસાથે જોડે છે. તેમણે કહ્યું હતું કે, આજે પ્રાકૃતિક ખેતી, ટેકનોલોજી અને પર્યાવરણ સંરક્ષણના સમન્વયથી અન્નદાતાના સશક્તિકરણ તરફ ગુજરાત આગળ વધી રહ્યું છે. મુખ્યમંત્રીશ્રીએ પ્રાકૃતિક ખેતીને વધુ વ્યાપક બનાવવાની જરૂરિયાત પર ભાર મૂકવાની સાથોસાથ પાણી અને વીજળીનો વિવેકપૂર્વક ઉપયોગ કરવા તેમજ વૃક્ષારોપણ અને કુદરતી સંસાધનોનું સંરક્ષણ કરવા સૌને અનુરોધ કર્યો હતો. મુખ્યમંત્રીશ્રીએ આજે નિમણૂક પામેલ સૌ મદદનીશ ખેતી નિયામકોને અભિનંદન પાઠવી, કૃષિમાં ટેકનોલોજી થકી વિકાસ કરી વિકસિત ભારત માટે વિકસિત ગુજરાતના નિર્માણનો વિશ્વાસ વ્યક્ત કર્યો હતો.

મુખ્યમંત્રીશ્રીએ આ અવસરે ગાંધીજીની દિવ્ય ચેતનાને વંદન કરતાં જણાવ્યું હતું કે, સાબરમતીના સંત અને અહિંસાના પૂજારી એવા યુગપુરુષ મહાત્મા ગાંધીજીએ પોરબંદરની આ પવિત્ર ધરતી પર જન્મ લઈ સમગ્ર વિશ્વને સત્ય, અહિંસા, સર્વોદય અને વિશ્વબંધુત્વનો માર્ગ બતાવ્યો છે. મુખ્યમંત્રીશ્રીએ જણાવ્યું હતું કે, પૂજ્ય બાપુના સર્વધર્મ સમભાવ અને સ્વચ્છતાના વિચારને વધુ વ્યાપક બનાવી માનનીય વડાપ્રધાન શ્રી નરેન્દ્રભાઈ મોદીએ સ્વચ્છ ભારતના સંકલ્પ સાથે છેવાડાના માનવીના કલ્યાણને કેન્દ્રમાં રાખીને ગામડાં અને ગરીબ સુધી વિકાસ અને સુવિધાઓ પહોંચાડ્યા છે. મુખ્યમંત્રીશ્રીએ સૌને પૂજ્ય બાપુના સત્ય, અહિંસા, પ્રેમ અને સર્વોદયના માર્ગે ચાલવાનો સંકલ્પ લેવા અનુરોધ કરી આત્મનિર્ભરતા, ગરીબ કલ્યાણ, સ્વચ્છતા, પર્યાવરણ સંરક્ષણ અને રાષ્ટ્રના સર્વાંગી વિકાસના સંકલ્પ સાથે આગળ વધવા આહવાન કર્યું હતું.

મુખ્યમંત્રીશ્રીએ વન મહોત્સવને પર્યાવરણ અને વિકાસને સાથે લઈને ચાલવાનો ગુજરાતનો સંકલ્પ ઉત્સવ ગણાવી જણાવ્યું હતું કે, માનનીય વડાપ્રધાન શ્રી નરેન્દ્રભાઈ મોદીએ રાજ્યમાં પર્યાવરણ સરંક્ષણની આખી ઈકોસિસ્ટમ ઉભી કરી છે. આપણે પર્યાવરણના ભોગે નહીં પરંતુ પર્યાવરણ જતન અને સંવર્ધન સાથેનો વિકાસ કર્યો છે. મુખ્યમંત્રીશ્રીએ વન, વન્યજીવ સૃષ્ટિ અને પર્યાવરણના જતન સાથે વિકાસના સંવર્ધનથી વિકસિત ભારત 2047 માટે વિકસિત ગુજરાતને અગ્રેસર રાખવાનો સંકલ્પ લેવા સૌને આહવાન કર્યું હતું.